買婚戒

尋日去周大福拿我們訂了的婚戒，過程十分順暢，拿了戒指之後就去Mega Box 睇Harry Potter IMAX 版。

其實對於Harry Potter 套戲沒有太大期望，一來都唔記得之前講過o的乜，二來覺得套戲拍得又長又悶，只不過睇開就繼續睇埋佢。而IMAX 3D效果就覺得幾搞o野， 每一個人真係突晒出來，幾有3D的感覺。我覺得如果把這個技術放在之前播的變形金剛或者科幻戰爭片，效果應該幾正。不過最正就係播到中途時，忽然有一樣不知名物體(可能係蒼蠅，蜘蛛又或者灰塵)黏在投影器，更加有3D 的效果，更引起觀眾一陣騷動，十分搞笑。

過大禮

原來未過大禮係唔可以派帖的，呢樣o野我都係早兩個月先知的。而七月係唔可以過大禮的，我早一個月才知。唯有臨時臨急揀了八月十一日(易嫁娶)過大禮，咁大日子，當然要賀一賀佢，連走了的帕布都吹返轉頭趁下熱鬧......

話說從頭，原本打算簡簡單單一封大利是就搞掂的過大禮。後來聽完各方友好的意見，也變得樣樣齊了。物品清單如下：

1. 西式餅咭一大疊; 2. 中式餅咭一大疊; 3. 四式水果一大堆; 4. 海味兩大包; 5. 唐餅幾打連兩大籮; 6. 意頭o野兩大籃(酒樓送的); 7. 當然唔少得禮金及利是

本來一切都安排得十分完善，八月十日拿唐餅回家，十一日再駕車去拿意頭o野及水果就可以去送大禮了，連我自己都想讚自己醒，安排得當。

誰不知，原來準新朗係唔可以自己送大禮的，要搵雙數的長輩幫我送，仲要有上有下(上即父母, 下即兒女)，搵晒我所有的親戚都係得表哥一個符合「資格」，唔通真係過唔成大禮，唯有叫埋我老爸算數啦。

到十號中午，我訂了唐餅打算放工去拿，點知天文台就掛八號波，個個都話要關店，唯有一放工馬上跑去拿唐餅。拿了唐餅及籮跟本就無手拿遮。又無的士搭(本來上左架的士，但司機只係肯由荃灣車我去大窩口)，唯有死死氣走去搭Van仔(好彩無搭地鐵，又要讚下自己醒！)再行返屋企，橫風橫雨，好不凄慘。一返到屋企，又要馬上駕車去拿意頭o野，又撞著紮鐵工人阻街示威，塞了成個鐘，好彩最後都趕到。

「過大禮先o黍落雨，唔通連個天都唔鍾意我？

聽日一定會好天o既！(好彩第二真下落晒波，只係落微雨)

你點知今日會好天o家？

情比金堅ar ma！」

訂喜帖

昨晚去金都商場對喜帖，之前在會展已經訂了，上個禮拜交了第一稿。昨晚主要目的就是要對一下電腦和原稿有沒有出錯。這對於我們兩個人簡直係手到拿來，因為我們平時就係要不停對Account，所以好快就搞掂。

印完帖，當然就係要派啦！

報告長官！紅色炸彈已經上彈！3....2......1.......Fire!!!

買紅酒

昨晚去了尖沙沮買婚宴飲的紅酒。原本我們心目中想買的法國Cheatau零五年份紅酒己經賣晒，我們都好失望。(嘻嘻，唔好以為我地真係識酒之人，只不過因為那支酒可以買一送一。)

後來店長就介紹了另外一隻Henri Lavigne 2004 年份的，又話易入口，又唔dry，又香又好味，又請我地飲，飲完又送你一對翼。講真句，我好少飲又唔識飲，你話好味咪好味lo.....終於係店長的的努力遊說之下，我們買了四十支。其實我覺得四十支咁多真係有少少過份，佢就話一張臺兩支差不多，唔係話，我記得我上次去飲，我地成臺都叫左橙汁，得一個人叫左杯紅酒，仲要係飲唔晒添。如果有剩兩打，我咪死得。雖則我阿哥和女朋友家姐都就來結婚，但係抬兩打番屋企都幾係o野，所以唔該各位幫我清一清佢，但係唔識飲或唔鍾意就唔好夾硬來，事關我空肚飲都有少少wing wing 地。

最近比較忙

被投訴很久沒有寫日記了, 因為我由細到大都沒有寫日記的習慣。哈哈！

其實也沒有什麼好寫，反正每天都是形形役役，返工放工，吃飯睡覺，剩餘的時間，我選擇了玩Wii, PSP以及玩股票。假如還有時間多了出來，我都會用來望著電視發呆(題外話，因為要看英超，所以裝了Now，發現有一台叫Panda Channel，就是由海洋公園播放的一日廿四小時盈盈樂樂生活記錄，絕對可以比得上魚樂無窮，更加適合我對住電視發呆。)所以結論就是沒有時間寫日記了。

剛剛做完公司的年報，現在又要忙結婚的事情，雖然已經不停努力，但發覺還有很多o野未搞掂，新郎衫，片頭相，約兄弟，傾酒席及菜餚，小禮物，司儀，還有很多零星的事情，煩也煩死人了。